Werpeloh – Eein moijen plattdütsken Namiddag bie Koffe un sülvgebäeckten Kauken un Geproot boot de Heimatverein Werpel Sonndag namiddag an.

Dat füng an mit’ne Andacht up plätt: Gott verstäeht jeeidet Gebett und jeeidet Singen in aale Spraoken, mit un ohne Wöörde.

Deei Frauenchor „De Leiwiks“ süngen van dät Plesäier, plätt tau prooten un tau höern un van de fröiheren Tieden, as Beispiel, wo moij dat Geräusch van deei olde Koffemöahle klung. Düsse Koffemöahlen bünnt vandage uk jae waer hoch in’t Anseeihn.

Deei Kinner ut deei Grundschaule St. Franziskus süngen van deei „Groote Visite“ un van annere Höhepunkte van’t Laeben in’t Döarp – un seei härn doar richtig Spaß an! ‚n lüttken Sketch öaver eein verkehrden Stadtplan und at Seuken na’n richtigen Wech rundete dat Gänze of.

Plättdütske Geschichten un Gedichte, besünners ok van denn Werpler Heimatdichter Knolls Bernd lööten deei olden Tieden weer lebendig weern un möeken den Namiddag rund.

Nich tau vergäeten de moijen  Belder, deei Franzien Heinz sammelt häer un in „Power Point“ wiesen döe. So manchen olden Keerl künn sück doar as „jungen Spund“ in Aktion belewen.

De Vorsitter Wilhelm Wigbers und deei ganze Vorstand meeinde: Dat was wall ´n moijen Namiddag!

Text/Foto: Heimatverein Werpeloh